PR Lú Olo Kondekora Prezidente Portugál No Governador Austrália

Naunil Média (Dili), Prezidente Repúblika (PR), Francisco Guterres “Lú Olo” sei kondekora Prezidente Repúblika Portugueza, Marcelo Rebelo de Sousa, no Governadór-jerál Australia, David John Hurley, ho grau Grande-Colar.

“Prezidente Repúblika Portugueza, Marcelo Rebelo de Sousa, nu’udar sidadaun mundu nian ne’ebé defende valores universais hanesan pás, liberdade no autodeterminasaun povu, liberdade espresaun, fraternidade entre povu husi nasaun oioin, no valores seluk ne’ebé sai komun ba timoroan sira,” dehan liu husi Komunikadu ne’ebé Naunil Média asesu iha palásiu Prezidensiál Nicolau Lobato Bairru Pite Kinta, (19/05).

Tuir Dekretu Prezidente Repúblika númeru 28/2022, 18 Maiu ne’e mós hateten domin ne’ebé prezidente Portugál sente ba povu TL nune’e mós PR Lú Olo pesoalmente sente domin Timor oan ba Portugál.
“Iha tinan-20 Restaurasaun Independénsia domin ne’ebé Prezidente Marcelo Rebelo de Sousa sente ba Timor-Leste no husi Povu timorense halo há’u pessoalmente sente domin husi timoroan ba Portugal, ba portugés no Língua Portugeza,” haktuir dekretu PR.

Nune’e mós tuir Komunikadu ne’ebé mós esplika Governadór-jerál Australia nu’udar belun boot Timor-Leste nian, ligasaun atual Governadór-Jerál Australia ho Timor-Leste hahú tiha ona molok Restaurasaun Independénsia. David Hurley komanda Primeira Brigada iha 1999 no 2000 iha Darwin, apoiu operasaun lidera husi Australia iha Timor-Leste durante período ne’e.

Ho nune’e iha Dekretu Prezidente Repúblika númeru 29/2022, 18 Maiu, ne’e mós afirma Governador Austrália desde 2019 kontinua guia nia komportamentu atu hasa’e sentidu estadu no hametin relasaun entre povu Timor-Leste no Austrália.

“David Hurley, Governadór-jeral Australia, desde 2019, kontinua guia nia komportamentu atu hasa’e sentidu Estadu ne’ebé karateriza, hametin relasaun amizade entre Estadu no Povu Timor-Leste no Australia. Agora mak to’o ona momentu katak Repúblika Demokrátika de Timor-Leste no Povu Timorense rekoñese, ho gratidaun, papel ne’ebé dezenvolve husi David Hurley,” informa Komunikadu.

Ordem Timor-Leste kria husi Dekretu-Lei númeru 20/2009, 6 Maiu, ho objetivu atu rekoñese no agradese nasionais no estranjeirus, tanba sira-nia komportamentu ou aktu ne’ebé sira pratika, iha kontributu signifikativu ba benefísiu país, timoroan ou umanidade.

Ordem Timor-Leste iha grau haat, ida mak Grande-colar. Grande-colar atribui eskluzivamente atu agrasia Xefe Estadu husi paízes soberanus no Serimónia kondekorasaun ba Prezidente Repúblika, Marcelo Rebelo de Sousa, no Governadór-jerál David John Hurley sei hala’o, ohin, iha Palásiu Prezidensiál Nicolau Lobato.*Jos