KI Apresia PN Aprova Loron Nasionál ba Liberdade Imprensa ‘16 Outubru’
Naunil Media (Díli), Prezidente Konsellu Imprensa (KI), Virgílio Guterres, informa lori konsellu imprensa nia naran fo apresiasaun ba Parlamentu Nasionál (PN) aprova loron Nasionál ba liberdade imprensa iha debate loron Tersa 24 fulan Maiu ne’ebé liu husi rezolusaun parlamentár katak, loron 16 fulan Outubro nu’udar loron Nasionál ba liberdade imprensa.
“Apresiasaun ne’e tanba ida esforsu naruk ne’ebé durante komunidade media sira halo, hahú kedas iha inisiu 2000 no husi inisiativa AJTL, sekretáriu estadu komunikasaun sosial (SECOMS), asosiasaun barak mós ba propoin ona data ida ne’e, i depois KI mai tan halo konsulta alargada ida ho organizasaun jornalista sira hotu diskute kona-ba data sira ne’e ikus mai hotu-hotu konsensu hili loron 16 fulan Outubro nu’udar loron Nasionál ba liberdade imprensa”, Virgílio ba jornalista liu husi konferensia ba imprensa iha Kintal Bo’ot, Kuarta (25/5)
Nia hateten, organizasaun no jornalista sira hodi lori buat ne’e ba orgaun estadu nian hodi aprova, no ikus mai horseik iha loron 24 fulan Maiu PN aprova.
“KI mós akompana debate iha Parlamentu, no iha deputadu ho deputada barak mak kestiona kona-ba loron ida ne’e, tanba sa mak la hili loron seluk no tenki hili loron 16 fulan Outubro mak nu’udar loron Nasionál ba liberdade imprensa. Hili 16 fulan Maiu ho razaun tanba loron ne’e la’ós de’it polítika ou jornalistika hanesan asasinatu ida maibé mós nia sai hanesan iha nuansa polítika ida bo’ot teb-tebes” tenik Virgílio
Nia argumenta, tanba invazaun militár Indonézia nian ou invazaun ne’ebé hahú ho luta halo povu Timor tomak hamrik atu luta, ne’e hahu ho asasinatu jornalista nain 5 iha Balibó iha loron 16 fulan Outubro.
“PN rekomenda mós ba governu, katak kada tinan loron 16 fulan Outubro ne’e promove asaun no kampana informasaun ou sensibilizasaun kona-ba importánsia liberdade imprensa ninian”, akresenta nia.
Ikus nia esplika, rezolusaun ne’e mós apela ba orgaun komunikasaun sosial, ba jornalista, no mós ba KI, ba ensinu superior sira ne’ebé liu-liu relasiona komunikasaun sosial atu asosia hamutuk selebra loron ida ne’e hodi promove liberdade imprensa no mós hodi defende direitu públiku informasaun ninian. LTS
