PM Taur: Governu Reativa Hikas Fali Arte Marsiais Tolu
Naunil Média (Díli), Primeiru Ministru (PM) Taur Matan Ruak Informa, Governu da Ualu konstiuisional liu husi Sekretáriu Estadu Juventude no Desportu (SEJD), reativa hikas Grupu Arte Marsiais (GAM) tolu, hanesan Persaudaraan Setia Hati Terate (PSHT), Ikatan Kera Sakti, Putra Timor-Leste (IKS.PTL) no mós Kmanek Oan Rai Klaran (KORK).
“Estadu Timor – Leste no governu iha polítika ida de’it mak halibur, maibé la’ós fahe polítika ida ne’e la’ós ohin de’it mak ita adopta, maibé uluk kedas ita uza polítika ida ne’e no lori polítiku ida ne’e mak ita manan funu”, Primriu Ministru (PM) Taur Matan Ruak ba jornalista sira iha Ginaziu Desportu Díli, kinta, (26/05).
Xefí ezekutivu ne’e hatutan, Ita boot sira nia lider barak iha ne’e uluk hamutuk ho ha’u luta ba ukun an , no ha’u kontente loos halibur fila fali imi hodi luta ba dezenvolvimentu Timor-Leste nia.
Tuir Prezidente (IKS.PTL) Silvestre Sufa hateten, Tenke hato’o obrigadu barak ba governu ida ne’e, tanba bele uza fali ropa sira nee.
“Iha tinan 9 nia laran ita la uza ropa sira ne’e ropa sira ne’e rai de’it iha Armariu laran, tanba ne’e agradese ba governu ida ne’e, no mós SEJD ne’ebé mak durante ne’e servisu hamutuk ho ita, no kooperasaun ne’ebé di’ak tebes ho arte marsiais sira”, Dehan Prezidente (IKS PTL) Silvestre Sufa.
Nia hatutan, Oportunidade ida ne’e husu ba lideransa arte marsiais sira iha ne’e, atu unidade nafatin para labele kria tan problema iha futuru, hahú agora tenke kria amizade ba malu atu nune’e bele dura ba tinan naruk nia laran.
Iha fatin hanesan, Prezidente KORK, Antonio Verdial informa, Loron ohin hot-hotu mai halo lansamentu primeiru inisiu ba arte marsiais 3, ne’ebé durante ne’e estadu suspende no taka hela ba tinan 10 nia laran.
“Agradese tebes ba ohin loron ita nia governu ne’ebé lidera husi Primeiru Ministru ho membru governu tomak ho SEJD, no mós Prezidente KRAM hamutuk servisu makaas bele fó fali oportunidade ba arte marsiais 3, ne’ebé durante ne’e taka hela”, katak nia. Ana
