PN Preokupa MS Abandona Postu Saúde Sira Iha Viqueque
Naunil Media (Díli), Reprezentante povu iha Uma Fukun Parlamentu Nasionál (PN) preokupa, tanba Governu konstitusionál da-8 liu husi Ministériu Saúde abandona (la iha profesionais saúde) postu saúde sira iha Munisípiu Viqueque.
Preokupasaun ne’e hato’o husi Bankada Frente Revolusionáriu Timor-Leste Independénsia (FRETILIN), Deputadu Dário Madeira, liu husi sesaun plenária PN, Segunda (27/06).
“Iha munisipiu Viquque kuaze suku hot-hotu laiha ona parteira. Ha’u husu esplikasaun ba parte relevante sira”, hateten Deputadu ne’e.
Nia informa, kuaze suku hotu-hotu iha Viqueque parteria laiha ona, entaun bainhira inan isin rua sira atu tur ahi (partu), sira kontaktu direita ba ambulansia hodi tula sira ba Ospital Munisípiu.
“Postu saúde sira mamuk hotu, profesionais saúde (médiku) laiha”, tenik reprezentante povu iha Uma Fukun Parlamentu Nasionál ne’e.
Nia husu ba Ministériu Saúde atu haree asuntu ne’e ho sériu, sei di’ak liu tun direitamentu hodi haree kondisaun real iha terenu.
“Atendementu Governu ba ema ki’ik, la’ós ba ema bo’ot sira. Governu gasta osan ba sira (profesionais saúde/médiku) maibé ezekuta servisu lala’o”. hakotu nia. Ana
