FOKUPERS Konvida PR Marsa Hamutuk Loron LVD
Naunil Media (Díli), Diretora ezekutiva Forum Komunikasaun ba Feto Timor-Leste (FOKUPERS) Maria Fatima Pereira Guterres Konvida Prezidente Repúblika atu marsa hamutuk hodi komemora loron Lei Violensia Domestika (LVD).
Lia hirak ne’e hato’o husi ezekutiva FOKUPERS ba Jornalista sira hafoin remata enkontru ho Prezidente Repúblika (PR) José Manuel Ramos Horta iha palásiu Prezidensiál Nicolau Lobato Bairru Pite, Tersa (28/06).
“Ita mós Konvida Prezidente Repúblika tanba momentu lei iha Prezidente Repúblika nia tempu anterior Prezidente mak Promulga entaun ita hakarak Konvida fali Prezidente atu bele hamutuk ho organizasaun sosiedade sivil hotu no mós organizasaun sira hotu ne’ebé servicu ba violensia bazeia ba jéneru no mós kontra violensia domestika, atu halo marsa ida hodi hasa’e ema nia konsensia no mós atu bele fo mensajen ruma ba komunidade katak violensia ne’e lá’os kultura Timor nian” dehan ezekutiva FOKUPERS
Ezekutiva ne’e hatutan FOKUPERS mós fahe informasaun ruma liga ho Prezidensiá Repúblika nia programa ne’ebé iha hanesan enpoderamentu ba ekonómia, edukasaun oinsá mós bele suporta organizasaun sosiedade sivil sira ne’ebé servicu mós iha area relevante sira.
Maria hateten FOKUPERS nia ezistensia ba 25 anos ona tanba ne’e aktualiza mós informasaun ruma ba Prezidente Repúblika kona-ba servicu no missaun FOKUPERS nian durante 25 anos, no mós implementasaun lei kontra violensia domestika ne’ebé tama ona ba 12 anos entaun FOKUPERS halo inisiativa ida oinsá atu bele marsa hodi hasa’e ema nia konsensia kona-ba hapara violensia domestika.
Iha enkontru ne’e Prezidente Repúblika mós hato’o nia disponibilidade hodi partisipa iha marsa ne’e, Aniversariu ba loron lei kontra violensia domestika loloos halao iha dia 7 Jullu maibé tanba dia 7 loron Kinta feira nune’e prefere halo iha Sexta para marsa hotu tiha sei taka iha palásiu Prezidente.*Jos
