TL-Banku Mundiál Asina Akordu Imprestimu Millaun $121 Ba Fornesimentu Bee Moos Díli Leste
Naunil Media (Díli),Timor-Leste (TL) ho banku mundiál asina akordu emprestimu orsamentu ho montante millaun $121 ba fornesimentu bee moos iha Díli parte leste.
Ministru Finansas, Rui Gomes, informa katak, akordu empréstimu refere atu dezenvolve, hadi’ak no sistema existente bee moos iha kapitál Díli parte leste.
“Benefisia populasaun hamutuk 82.380, liuhusi koneksaun bee ba uma sira no monta kontadór hamutuk 12.482 iha uma sira”, Rui Gomes, liu husi diskursu abertura iha Ministeriu Finnasas, Sesta (29/7).
Enkuantu Projetu ne’e sei hahú iha fulan-outubru tinan ida-ne’e, no ba durasaun tinan hitu hodi dezenvolve, hadi’ak no sistema distribuisaun no kanalizasaun bee moos iha kapitál Díli parte leste.
Investimentu estratéjiku iha área infraestrutura inklui bee moos, entegra ona iha Planu Estratéjiku Dezenvolvimentu 2011-2030, dokumentu importante ida ne’ebé sai hanesan baze ba Programa Oitavu Governu Konstitusionál.
Aleinde modalidade PPP, oitavu Governu konstitusionál mós kontinua halo aprosimasaun ba Ajénsia Kooperasaun Bilaterál (JICA) no Banku Multilaterál (ADB no Banku Mundiál) atu hetan empréstimu ho funan ki’ik ho objetivu atu finansia investimentu infraestrutura ne’ebé bele fó impaktu ba kresimentu ekonómiku iha rai-laran no garante Fundu Minarai bele moris naruk.
Hahú husi 2012 to’o 2022, empréstimu ne’ebé Governu foti ona husi ADB, Banku Mundiál no JICA hamutuk millaun $731,5. Husi montante ne’e, Governu foin mak ezekuta millaun $257 ka 36%.
To’o iha fulan kotuk, Governu selu fila fali ona millaun $20,3 ho nia taxa de juros millaun $18,4. Retornu inv estimentu Fundu Minarai to’o iha Maiu 2022 atinji 4,33% kada tinan, kompara ho kustu empréstimu baratu, 1,57% kada tinan. LTS/Gyor
