PLP Reajusta Estrutura Suku Com iha Postu Administrativu Lautém

Naunil Media (Lautém), Sábadu (10/09) ne’e Partidu Libertasaun Popular (PLP) reajusta estrutura partidu liu husi fó posse ba membru foun nível aldeia Lohomatu, suku Com, postu administrativu Lautém, Munisípiu Lautém, objetivu atu halo aktividade partidaria iha baze ho di’ak.

Aktividade posse ba estrutura mebru foun refere hamutuk na’in 54, kompostu husi estrutura aldeia Lohomatu na’in 27 no estrutura suku Com na’in 27.

Koordenador PLP Munisípiu Lautém, Carsiliano Oliveira, informa posse ba estrutura PLP iha nível aldeia, suku no postu, núdar kontinuasaun programa reajustamentu ne’ebé antes ne’e la’o tiha ona iha fulan ida ka rua ba kotuk.

“Reajustamentu liu husi posse ba estrutura membru foun iha báze ne’e atu ajuda, servisu máximu liu-tan hasa’e votus iha festa demokrasia eleisaun parlamentar-ElPar 2023, tanba iha tinan 2017, ita iha de’it votus 11”, Koordenador PLP Munisípiu Lautém, Carsiliano Oliveira, ba jornalista sira iha suku Com.

Koordenador PLP Munisípiu Lautém ne’e husu estrutura báze atu servisu maka’as liu-tan hodi atinji votus 250 iha ElPar 2023.

Aktividade posse refere prezensa mos Konsellu Polítika Nasional PLP, Merício Juvinal dos Reis “Akara”, hateten reajustamentu hahu la’o, tanba tempu badak sei halo konferensia munisípiu, antes ba kongresu nasionál.

“Pra-kondisi, núdar preparasaun ida atu halo konferensia munisípiu, depois mak ba kongresu nasional”, tenik Konsellu Polítika Nasional PLP, Merício Juvinal dos Reis “Akara”.   

Atual Sekretáriu Estadu ba Komunikasaun Sosial, Merício Juvinal dos Reis “Akara”, husu ba estrutura aldeia, suku, postu no munisípiu Lautém prepara àn antes ba konferensia munisípiu no kongresu nasionál, tanba PLP sai ona ajente ba dezenvolvimentu nasaun Timor-Leste.  

“Ita nia partidu sei sai ajente dezenvolvimentu nasaun nian, partidu ida ne’ebe mak sei hamutuk ho partidu sira seluk atu ukun ita nia rai”, dehan Akara.  

Entertantu Noe da Cruz simu posse núdar Koordenador PLP suku Com ho nia membru sira no Domingos Xavier núdar Koordenador PLP aldeia Lohomatu ho membru sira.

Partisipa iha aktividade posse ba estrutura refere, membru CPN, Constantino Brandão, membru CPN, Cipriano Madeira Pinto, vise I Koordenador postu Lautém, Raul Ximenes, Departementu Finansas PLP Munisípiu Lautém, Manuel dos Santos, vise I Kordenador PLP postu Lospalos, Constancio Ximenes no Koordenador PLP suku Fuiloro, Paulino da Costa. Tri