PR Horta: Ataúro Sei Sai Atraksi Turistiku Ba Mundu

Naunil Media (Ataúro), Prezidente Repúblika (PR), José Ramos Horta hateten Munisípiu Ataúro sei sai hanesan atraksi turistiku ba mundu maibé, komunidade Ataúro mak tenke sai duni modelu ba ambiente di’ak.

“Ataúro sai ona sei liu tan atraksi turistiku ba mundu maibé ita tenke haree, povu Ataúro imi mak hanesan kaer metin ilha ida ne’e kuda ai, kuda aifuan, kuda aifunan labele soe lixu tama ba tasi tantu Ataúro tenke sai duni modelu ba meu ambiente di’ak ne’e iha imi nia liman, labele estraga de’it bee ne’ebé iha”, dehan Xefe Estadu liu husi diskursu bainhira halo abertura ba eventu festival múzika no kultura iha Ataúro, Segunda, (21/11).

PR Horta mós agradese ba komunidade Ataúro tanba simu festival, no agradese mós ba institusaun estadu sira ne’ebé kolabora nune’e mós ba parseiru Internationál sira ne’ebé ajuda eventu ne’e.

“Agradese ba povu Ataúro ne’ebé simu festival ida ne’e, agradese mós kolaborasaun institusaun estadu sira hotu-hotu ne’ebé kolabora ba ida ne’e, ita agradese mós ba komunidade internasionál parseiru Internationál balun iha ne’e Nasoens Unidas, ita nia parseiru iha tinan sira ne’e nia laran ajuda ita”, katak PR Horta .

Horta mós husu ba povu Ataúro aproveita estadu no guvernu nia komitmentu hametin hatun tiha sub-nutrisaun iha Ataúro ba kosok oan sira no mós inan sira bele hetan hahán nutrisaun sufisiente naton ba saúde, estuda ba rai Timor-Leste.

Xefe Estadu mós husu Povu Ataúro tanba guvernu mós partisipa iha eventu ne’e rasik nune’e oportunidade di’ak tebes problema ne’ebé tinan barak nia laran ko’alia ne’e bele hetan solusaun, ladún difisil tanba uluk populasaun la barak bele iha orsamentu di’ak para Ataúro bele dezenvolve.

Nia mós agradese ba Primeiru Ministru Taur Matan Ruak ne’ebé apoiu makas ba inisiativa ne’e, inisiativa ke estadu nian Prezidensiá, Guvernu, Parlamentu Nasionál, no institusaun hotu-hotu, Munisípiu sira, sosiedade sivil, NGO hotu kolabora inisiativa ne’e, no sei halo Timor-Leste laran tinan ida ne’e no mós tinan foun mai. *Jos