Problema Kaderneta Pasaporte, Trabalhador 300 iha Korea Súl sei Lakon Servisu

Naunil Media (Díli), Asistente Adidu Timor-Leste iha Korea Súl, Paulo de Oliveira Rodrigues hateten kaderneta pasaporte laiha sei afeita ba Trabalhador Timor oan nain-300 sei lakon kontratu servisu no sai trabalhador ilegal tanba pasaporte mate.

“Difikuldade ne’ebé ami hasoru iha Korea Súl mak liga ho dokumentus trabalhador, ami alista ona trabalhador nain 300 liu mak daduk hetan problema ho pasporte, tanba sira nia pasporte atu mate”, Adidu TL iha Korea Súl ne’e ba jornalista sira iha Timor Lodge, Sesta (17/03).

Nia informa, problema refere parte adidu hamutuk ho embaixador haruka ona pedidu ba Ministérriu Negósiu Estrangerius atu buka tok dalan hodi rezolve, maibe seidauk hetan resposta.

“Trabalhador sira ne’e hetan amiasa, tamba sira nia kontratu la bele extende tuir lei Korea Súl. Pasaporte tenke válidu mak bele extende”, dehan Paulo de Oliveira Rodrigues.  

Nia haktuir, parte adidu hamutuk ho ministériu relevantes tenta komunika on aba imigarasaun Korea Súl, hodi extende kontratu servisu ba fulan néen (6) tuir lei Korea Súl.

“Extende ona fulan 6, hotu sira mai iha Timor mak ba fali, maibe pasaporte foun laiha sira labele tama fali Korea Súl”, tenik adidu ne’e.

Nia husu ba Ministériu Negósius Estranjerius no Kooparativa (MNEK) no Ministriu Justisa atu buka solusaun.

“Ami kansela trabalhador sira atu fila mai Timor hodi halo moris sira nia pasaporte tanba iha Timor taka hela atu halo pasporte”, haktuir nia.

Ikus Nia dehan, iha tinan 2023 ne’e, Governu Korea Súl liu husi servisu imigrasaun sei buka tuir trabalhador sira ne’ebe mak illegal hodi halo deportasaun. Tuir dadus imigrasaun Korea Súl, hatudu dadaun ne’e trabalhador timor oan nain-1005 sai illegal, husi númeru refere nain-100 mak deporta ona mai Timor. MJ3