KHUNTO-FRETILIN Kestiona Servisu PNTL
Nanil Media (Díli), Plenaria Parlamentu Nasional (PN), Segunda (20/03) ne’e, Bankada Kmanek Haburas Unidade Nasionál Timor oan (KHUNTO) liu husi Deputada Olinda Guterres, ho bankada Frente Revolusioáriu Timor-Leste Independente (FRETILIN), Deputadu Fabião de Oliveira, sira kestiona maka’as kona-ba servisu Polísia Nasional Timor-Leste (PNTL), relasiona komunidade balun iha capital Díli moris la seguru, tanba kontinua hetan tuda husi ema deskuiñesidu no oho malu.
Deputada Olinda, hateten PNTL seidauk halo kontrolu (patrollamentu) máximu ba bairu sira iha capital Díli, liu-liu iha parte Ponte Komoro konsidera area risku.
“Parte Komoro Ponte sorin, hau simu telfoni ema tuda kal-kalan, semana ida nia laran tuda hela deit, fatuk husi ne’ebe sira la haten; Polísia sira preokupa de’it sira nia saláriu, Governu hasa’e tiha sira nia salariu, tansa sira la kontrola situasaun nune’e komunidade sira bele moris seguru”, haktuir reprezentante povu ne’e liu husi nia intervensaun iha PN.
Deputada ne’e fo sasin, “akontesementu kazu omísidu ida foin lalais iha Kulau, Bekora, akontese iha Kos maun alin nain tolu, sona mate ida alin ikun, nain rua kanek todan, ida ne’e prova ona ba públiku tomak, katak polísia nia servisu seidauk máxima.
Iha fatin hanesan, Deputadu FRETILIN, Fabião de Oliveira, husu ba Polísa Trânzitu no Diresaun Nasiona Trasporte Tereste (DNTT) atu kontrolu ba sidadaun sira ne’ebe mak kontra sinais trânzitu.
“Polísia Trânzitu servisu rodoviariu atu haree konaba engrafamentu iha capital Díli, tamba ita nia sidadun balun halo violasaun ba regras sinais trânzitu, tanba laiha polísia trânzitu hein iha Estrada”, tenik deputadi ne’e.
Nia dehan, VIII Guverno Konstituisiona hasa’e ona salariu PNTL, maibe servisu barak mak abandonadu. Gyor/MJ3
