Arsénio Bano Fa’an Ona Rezidensia Fulolo Ba Marí Alkatiri
Naunil Media (Oe-Cusse), Prezidente Autoridade Rejiaun Espesiál Oe-Cusse Ambeno (RAEOA), Arsénio Paixão Bano, rekuinese katak loos duni Prezidente Autoridade RAEOA mak fa’an rezidensia estadu nian, iha area Fulolo, Aldei Sanane, Suku Costa, Rejiaun Pante-Macasar RAEAO, ba eis Prezidente Autoridade RAEOA Marí Alkatari.
“Sim, la’os ha’u mak fa’an, maibe mekanizmu ka lei ne’e mak fo dalan, osan ne’e tenke tama fali ba iha kofre RAEAO, publikasaun ne’e agora la’o dadauk, se mak iha reklamasaun bele ba, rezidensia Fulolo ne’e nia investimentu públiku ba privadu, RAEOA ne’e iha mekanizmu harii rezidenisa para ema bele aluga”, Arsénio Bano ba jornalista sira, iha Salaun Dominikanu Santa-Rosa, Sub-Rejiaun Pante-macassar Villa, RAEOA, Kuarta (16/08).
Nia hatutan, “Ema bele sosa, osan tenke tama fali, Prezidente autoridade RAEOA rasik hela iha Fulolo mos tenke selu fulan-fulan, la iha gratis iha rezidensia Fulolo. Osan ne’e mai husi fundu espesial dezenvolvimentu, ema bele sosa, sei prezidente hakarak sosa, osan tama fali ba estadu”.
“Iha fulan Jullu ne’e, bainhira autoridade RAEOA submete karta akordu kontratu atu fa’an komunidade sira nia rai inklui rezidensia estadu ba eis-Prezidente Autoridade RAEOA, Marí Alkatiri, ba Diretór Rejionál Rejistu Sívil Notariadu Konservatória RAEOA, atu asina karta akordu kontratu refere ne’e, maibe husi Rejistu Sívil Notariadu Konservatória RAEOA rasik, rekuza tiha karta refere, tanba konsidera karta refere la prense rekezitu”, tenik Bano
Antés ne’e, komunidade vitima rai afeitadu sira hamutuk uma kain hitu nolu resin neen (76) ne’ebé sira nia rai afeta ba iha konstrusaun rezidensia estadu Fulolo ne’e, halo protesta hasoru Prezidente Autoridade RAEOA Arsénio Paixão Bano, tanba hahu husi tinan 2015 to’o agora, autoridade RAEOA sidauk selu indeminijasaun ba komunidade sira nia rai.
Prezidente autoridade RAEOA Arsénio Paixão Bano fa’an rejidensia estadu Fulolo, inklui komunidade sira nia rai ba Mari Alkatiri, ho montante orsamentu $556.669,04 no orsamentu ne’e Mari Alkatiri selu durante fulan neen nolu (60) no kada fulan nia selu ho montante $9.281,49. Ana
