SEKomS Expedito : “Kapasidade 3 Importante Ba Garante Kualidade Informasaun”
Naunil Media (Balibo), Sekretariu Estadu Komunikasaun Sosial (SEKomS), Expedito Loro Dias Ximenes, hateten atu garante kualidade informasaun (notisias) ne’ebe publika husi instituisaun media sira (televizaun, radio, jornal no plataforma online) ne’e presija pilar tolu importante mak kapasidade intelektual, proporsional no tékniku.
Membru Governu konstitusional da-sia, Expedito Loro Dias Ximenes, sita asuntu ne’e wainhira sai orador ba programa Forum Editorial Meeting ne’ebé organiza husi Konselho Imprensa Timor-Leste (CI-TL, Sigla Portugés), iha postu administrative Balibo, suku Balibo Vila, Domingo (15/10).
Governante ne’e subliña, polítika nonu governu konstitusional ba seitor komunikasaun social, iha pontu 16, kna’ar ne’ebe presija atu halo hodi garante kualidade informasaun, nune’e governu tau matan maka’as ba formasaun no kapasitasaun jornalista sira, liuhosi kooperasaun ho ajensias internasionais oinsa fo formasaun iha area lingua sira, tanba lingua mos bele determina ba iha kualidade informasaun.
“Ita hotu konsiente katak oras ne’e dadaun públiku kestiona hela kona-ba kualidade informasaun, ida ne’e kolega sira iha media ita hotu akompanha katak; Tanba sa, tanba primeiru ita uza lingua ne’ebe ho duvidas ba iha públiku atu kompriende saida mak ita hakerek, saida mak ita fo sai iha televizaun, radio no iha plataforma sira seluk tan”, tenik SEKomS, Espedito.
Tuir Nia, governu haree iha kapasidade tolu mak importante, no Konsellu de Imprensa mos haree ida ne’e, presija iha kapasidade Intelektual, presija iha kapasidade proporsional no presija iha kapasidade tekniku.
“Bainhira ita atu responde preokupasaun públiku kona-ba kualidade informasaun, kualidade kapasidade tolu ne’e presija tebes ba jornalista sira, mai husi ita nia-abilitasaun literaria edukasaun formal, mai husi ita-nia formasaun tekniku, nomos ita nia-adaptasaun ba iha atualiazaun ba iha avansu teknolójia ne’ebe oras ne’e dadaun ita atravesa”, dehan eis-konselleiro CI-TL no atual SEKomS ne’e.
Expedito argumenta, ho avansu teknolójia, públiku la’os de’it sai konsumidor informasaun, maibe públiku sai ona produtor ba informasaun, konserteza informasaun (notisias) ne’ebe mak fó sai hosi media konvensionais, ho media ne’ebe plataforma dijiatal.
“Konserteza informasaun ne’ebe mak sai ho media konvensionais, ho media ne’ebe plataforma dijiatal, dala barak bele provoka e bele hamosu duvidas iha publiku ou iha sosiedade nia-lieet. Tanba ne’e formasaun no kapasitasaun, governu fo tebes atensaun iha situasaun atu bele responde ho kualidade informasaun ne’ebe sai preokupasaun públiku nian”, akresenta SEKomS.
Programa Forum Editorial Meeting ne’ebé organiza husi Konselho Imprensa Timor-Leste CI-TL refere hodi komemora aniversáriu dahuluk Loron Nasional Liberdade Imprensa (16 Outobru 2022 – 16 Outbru 2023).
Tuir observasaun naunil.com iha terenu nota katak, aktividade selebrasaun loron nasional liberdade impresa tinan ne’e nia-partisipasaun mínimu teb-tebes husi instituisaun media no jornalistas, liu-liu laiha prezensa husi jornalistas no jerentes Radio Komunidade husi munisípius, maske aktividade refere ninia alvu mak orgaun komunikasaun social, instituisaun media no jornalistas. Kou
