PNTL Munisípiu Aileu Detein Joven Nain 2 Halo Transaksaun Ilegal Iha Fronteira
Naunil Media (Aileu), Komandu Polísia Nasionál Timor-Leste (PNTL), Munisipiu Aileu, halo ativitidade pasa revista ba kareta no motor sira ne’ebe halo movimentu iha estrada publiku konsege prende kareta kamioneta ida no asegura joven nain rua ne’ebe hatama sasan ilegal liu hosi fronteira.
Komandante Komandu Munisipiu Aileu, Superintendente Polisia, Jorge Monteiro,hatete, sidadaun timor oan nain 2 ne’e.
“PNTL kaptura tanba halo transaksaun ilegal iha fronteira terrestre Timor-Leste ho Indonézia”, dehan, Jorge Monteiro, Segunda (18/07).
Nia infrma, horikalan ita simu informasaun hosi komunidade sira katak iha kareta kamioneta ida konsege tula sasan ne’ebe hatama ilegal hosi Indonezia mai Timor-Leste.
“ami mos halo hela Auto Stop ba viaturas sira ne’ebe halo movimentu iha tempu kalan,”katak nia.
Entaun aproveita situasaun ida ne’e ita konsege halo aprensaun ba kareta refere ho numeru matrikula A. 53.60 no asegura mos joven mane nain rua ho inisial JmF no AsA durannte halo check point iha Komandu PNTL Aileu nia oin,”relata nia.
Nia hatutan, sasan sira suspeitu sira hatama illegal hosi fronteira Mota Masin iha Salele-Suai, Munisipiu Covalima no kontinua atu lori ba Dili.
“Sasan ilegal hirak ne’ebe ita prende maka hanesan sigaru marka Gudang Garam Surya 12 hamutuk pakote 640 total 6.600 kaixinas, tabaku lulun marka Pohon Sagu pakote hamutuk falun 60 3.200, tabaku lulun marka Matahari pakote 320 hamutuk falun 640 no-mos Supermie marka Indo Mie hamutuk kaixa 293”,tenik nia.
Jorge Monteiro akresenta, suspeitu nain 2 ho evidensia hirak ne’e asegura ona Komandu Munisipiu Aileu no kontinua halo investigasaun hodi buka tuir nain ba objetu hirak ne’e hafoin sei submete ba Ministeriu publik,”hakotu nia. Ana
