Kompaña ASL Associates Pty Ltd, Sei Investe Adobu Iha TL
Naunil Media (Díli), Kompaña ASL Associates Pty Ltd iha oportunidade sei investe Adobu organiku iha Timor-Leste (TL), ho eskala boot nune’e bele kria kampu traballu ba timoroan sira.
Kestaun ne’e hato’o husi Diretur kompaña ASL Associates Pty Ltd Lewis Hunter ba Jornalista sira hafoin remata enkontru ho Prezidente Repúblika PR José Ramos Horta iha palásiu Prezidensiál Nicolau Lobato Bairru Pite, kinta, (10/11).
“Ami mai hasoru Prezidenti hodi hare’e ba oportunidade balun iha Timor-Leste atu dezenvolve komersiu industria Adobu Mineral Organiku ne’ebé iha ona progresu enkontru balun no iha prosperu no interesante tebes ba ami nia kompania atu investe iha timor, hodi dezenvolve planta industria Adobu Mineral Organiku ho skala ne’ebé bo’ot, hanesan kria oportunidade no kampu trabalhu,” tenik Diretór kompaña
Lewis Hunter hateten kada planta sei fó servisu ema ba atus ida resin nune’e joven sira sei orgullu, tanba ne’e ohin enkontru inisiu nune’e sira sei fila-fali mai iha fulan balun tan, atu hasoru Prezidente Repúblika hodi diskute klean kona-bá progressu husi planu ne’e rasik.
Nia dehan sira hetan suporta husi Xefe Estadu tanba ho esperensia internasional hanesan hela iha estranjeiru no servisu governu rai seluk entaun PR hatudu sinerjia ba saida mak sira atu halo iha Timor-Leste. No aman nasaun ne’e mós motiva sira atu kontinua halo negosiasaun ba planu refere.*Jos
