Eko-Turizmu Iha Porlamano Mehara Kada Loron Rekolla Reseitas $50.00
Nauni Media (Lautém), Juventude husi Aldeia Porlamano, suku Mehara, Postu administrativu Tutuala, Munisípiu Lautém, ho inisiativa harií fatin turismu komunitáriu ida, lokaliza iha iha Parque Nasionál Komadante Nino Konis Santana.
Reprejentante Juventude Aldeia Porlamano, Adriano Asunção, informa sira harií fatin turizmu ne’e iha fulan Novembru 2020, no dadaun ne’e hetan ona vizita husi turista lokal, liu-liu komunidade munisípiu Lautém rasik.
“Ami Juventude Aldeia Porlamano ho inisiativa harií fatin ida ne’e. Ami kontribui ona reseita ba kofre Aldeia nian, mai husi vizitante sira, kada ema selu koima 0,50 centavus”, Reprezentante juventude aldeia Porlamano ne’e, ba jornalista Naunil Media, iha Parque Nasional, Kinta (31/12).
Kada loron bele rekolla $50 to’o $60 no osan ne’e hatama ba aldeia nian.
“Ami informa ona, tempu badak osan ne’ebe ami rekolla ne’e sei hatama ba kofre aldeia nian hodi atende ba nesesidade aldeia laran”, esplika nia
Vizitante Vilena Dos Santo kontente mai bele vizita fatin Parque Nasional Komandate Nino Konis Santana.
“Hau louva ba Juventude Porlamano tamba bele harií fatin turizmo ne’e iha Parque Konis Santana”, tenik vizitante ne’e.
Nia dehan “Tenke promove nafatin ita nia fatin turizmu, atu aktu ida ne’e ezemplu no motiva hanesan ba juventude seluk iha Munisípiu Lautém”. Latu
