Faustino Cardoso Husu PM Taur Buka Lalais Ema Foun Lidera KFP
Naunil Media (Díli), Segunda (25/05) ne’e, Prezidente Komisaun Funsaun Públika (KFP), Faustino Cardoso husu ba Primeiru Ministru (PM), Taur Matan Ruak atu buka lalais figura (ema) foun ida atu lidera KFP, tanba mandatu ba atual Prezidente nian sei remata iha loron 29 fulan Maiu 2020.
Prezidente KFP, Faustino Cardoso, ba jornalista sira hafoin audensia ho xefe governu konstitusionál da-ualu, Taur Matan Ruak, iha Palásiu Governu.
“Mandatu komisaun Funaun Publika nian ne’ebé mak sei ramata iha loron 29 fulan Maiu tinan ida ne’e. Ohin loron 25, hela loron 4 deit ona, tanba ne’e mak atu haree oinsá ba oin iha fali prezidente komisaun funsaun públika”, informa atual Prezidente KFP, Faustino Cardoso.
Nia esplika, “Mandatu ba komisáriu ema nain 5, nain 3 mai hosi governu no nain 2 hosi parlamentu nasionál (PN), ne’ebé ohin, ko’alia kona-bá oinsa komisaun funsaun públika nia atendimentu administrasaun públika iha nia kontinuidade no labele para, ne’e tenke iha lideransa ida, se la iha bele prejudika”.
Eis Prezidente Komisaun Nasionál Eleisoens (CNE-Sigla Português), Faustino, haktuir, Primeiru Ministru, Taur Matan Ruak ninia mensajen ba prezidente funsaun públika mak kontinua halo servisu hanesan bain-bain, nune’e bele asegura funsionamentu komisaun funsaun públika nian labele paradu.
“Ha’u seidauk hatene, sé mak atu truka hau nia fatin, hodi lidera fali prezidente funsaun públika nian, ita hotu hein de’it”. dehan Nia. Lop
