PTR Deolindo Deklara, Durante SS Serbisu Tribunál Funsíona Normal
Naunil Media (Dili), Prezidente Tribunal Rekursu (PTR) Deolindo do Santos deklara durante implementa serka sanitária fulan ida iha Munisipiu Dili no Covalima inklúi Baucau. maibé serbisu tribunal-nian lao normál.
Deolindo dos Santos deklara asuntu ne’e hafoin reuniaun mensal ho Prezidente da Repúblika (PR) Francisco Guterres “Lu Olo” iha Palasiu prezidensíal Nicolao Lobato Bairo Pité Dili, kuarta (24/03/2021).
“Ohin ne’e ha’u halo reuniaun mensal ho sua eselensia Prezidente da Repúblika. Ha’u nu’udar Prezidente Tribunal de Rekursu atu informa ba sua eselensia Prezidente da Repúblika mais ou menus servisu tribunal sira nian durante fulan ida nia laran, liuliu ba situasaun ida ne’ebé mak ita hasoru hela mak estadu emerjensia, serka sanitária i konfinamentu obrigatoriu iha Dili Baucau i Suai ne’ebé ke ita liu ona entaun informasaun ne’ebé ha’u hato’o ba sua eselensia katak mezmu ke ita iha situasaun hirak ne’e maibé tribunal funsiona normál”, dehan PTR.
Prezidente Tribunal Rekursu ne’e mós informa durante serka sanitária no konfinamentu obrigatoriu ho rezolusaun Governu ne’ebé iha, nia mós hola parte hanesan konsellu superiór halo despaisu hodi regula servisu tribunal sira iha Dili, Baucau no Suai hodi kontinua prosesu ne’ebé mak bele halao no labele kontinua i prosesu ne’ebé mak labele hala’o.
“Ho modu ne’ebé ke reduzidu entaun tanba saida mak buat sira ne’e akontese tanba tenke ser kumpri regra serka sanitária ho konfinamentu obrigatoriu prosesu ne’ebé mak hala’o mós limitadu ne’e hare’e ba rezolusaun ne’ebé ke guvernu hasai entaun nu’udar Prezidente i konsellu superior maisestratura judisial nian ho despaxu balun ne’ebé ke regula servisu iha tribunal Suai, Baucau inklui Dili nian ne’e mak regula mais ou menus prosesu saida mak bele halao no prosesu sira ne’ebé mak labele hala’o”. nia afirma.
Deolindo do Santos hatutan durante Prosesu ne’ebé tenke la’o nafatin mak prosesu ne’ebé halo primeiru interogatoriu, hodi halo prosesu sumariu ne’ebé ke menus husi tinan lima (5), prosesu ne’ebé tenke iha kontinuasaun ba julgamentu para atu reaprova no mós ba arguidu ne’ebé prezu.
Nia dehan despaixu ne’e mós la taka dalan ba juiz sira para atu bele nafatin ba prosesu ne’ebé ke iha, mesmu ke laiha julgamentu ruma ne’ebé tenke hala’o, ida ne’e mak hato’o ba sua exselensia Prezidente da Repúblika.
“Ho situasaun hirak ne’e atu dehan de’it katak tribunal funsiona ho di’ak hela tanba hetan rekursu rasik mós la’o normál hela mezmu ke se ita boot sira ba karik juiz sira balun iha ne’ebá no juiz sira balun laiha ne’ebá ami organiza turnu funsionariu ofisiál justisa hotu hotu para atu Asegura servisu ne’e la’o ho di’ak”.
Nia deklara hafoin nia hato serbisu durante ne’e Prezidente da Repúblika apresia nafatin fo korajen atu bele servisu nafatin mezmu situasaun difisil, sua exselensia mós husu juiz sira kuidadu an nafatin.* Jos/pau.
