Lalenok United FC Kampeaun Copa FFTL 2020
Naunil Media (Díli), Lalenok United FC sai kampeaun ba Copa FFTL 2020 hafoin halakon nia ekipa adversariu AD SLB Laulara ho score 2-1 iha jogu Final mak hala’o iha Stadion Municipal Cafe Ermera, Domingu (25/10).
Jogu parte dahuluk, iha minutu 8 Cornelio Portela susesu lori ekipa AD SLB Laulara ho score 1-0.
Hela ho score 1-0 halo ekipa Lalenok United fo kontra-atake liu-husi bola aas no esforsu konsege hetan rezultadu pozitivu iha minutu 28, hafoin Elias Mesquita marka golu hodi halo empata score ba 1-1. Ho score ne’e mantein to’o termina jogu parte dahuluk.
Kontinua ba jogu parte daruak ekipa rua mantein halo kontra-atake ba malu hodi sai kampeaun dahuluk ba Copa FFTL 2020.
Minutu 83 Lalenok United hetan oportunidade hodi suta penalti hafoin Filipe Oliveira komete eru iha baliza oin.
Jogador Fabio Cristian ne’ebé sai ezekutor ba penalidade refere susesu marka golu hodi lori Lalenok United lidera ho score 2-1.
Score 2 versu 1 halo jogu kontinua manas liu-tan maibé la iha tan golu ruma mak akontese to’o termina jogu parte daruak, vitória ba ekipa Lalenok United FC hodi sai kampeaun ba Copa FFTL 2020. Dvo
