LUTA KONTRA INIMIGU INVIZIVEL “COVID 19” SEI SAI FASIL LIU NO GARANTIA NIA SUSESU WAIN HIRA AMAN NASAUN NAIN HIRAK NEBE SEI HAMUTUK HO ITA HAMRIK IHA FILHEIRA IDA, LIAN IDA NO ASAUN IDA DEIT MOBILIJA POVU TOMAK LUTA BA LIBERTA A’AN HUSI INIMIGU FOUN NE

“Hakerek nai’in Antoninho da Silva Pinto

Alumni UNTL-FCE”

Istoria hatudu katak Timor ho nia emar sira nudar ema luta dor,  iha esforsu no luta ba kestaun nebe defende bem komun Timor oan tomak sempre konsidera nudar esforsu koletiva husi kamada oi-oin ho meius oi-oin nune konsege lori vitoria.

Fase primeiru imfiltrasaun covid 19 iha rai doben Timor Leste konsege ultrapasa ho diak no susesu, ne nudar vitoria ida tan husi vitoria barak nebe Timor oan tomak atinji.

Luta oi-oin nebe akontese, iha palavra de orden husi aman nasaun sira nebe sempre motiva no habrani Timor oan hotu atu esforsu nafatin mak “A Luta Continua e A vitoria é Certa”.

Motivasaun seluk nebe habrani Timor nia oan doben sira firme iha luta koletiva mak dotrina ka mehi nebe aman nasaun sira kuda metin iha Timor oan tomak nia fuan “LIBERTASAUN TOTAL NO KOMPLETU” nebe deriva ba “LIBERTASAUN DA PATRIA” no “LIBERTASAUN DO POVU”

Aman nasaun sira nia unidade no esforsu koletiva, hamutuk ho povu doben TL konsege atinji “LIBERTASAUN DA PATRIA” nebe ita goja ona ho naran liberdade no independensia, iha era liberdade no independencia ne ejije Timor oan tomak luta nafatin ba atinji mehi LIBERTASAUN DO POVU.

Inimigu invizivel surto covid 19 nebe imfiltra ona mai TL konsideradu nudar inimigu komum povu TL nian nebe amiasa povu nia vida no limita tia povu tomak nia liberdade nebe hetan ona ho sofrementu oi-oin, nune rekere esforsu atu kombate inimigu invizivel refere no ne nudar luta ba LIBERTASAUN DO POVU.

Hare husi amiasa nebe surtu a’at ne hamosu no nia nivel perigu nebe iha hafoin fase segundo imfiltrasaun iha Timor no dadus ikus hatudu katak iha ona trasmisaun komunitario iha kapital nasaun TL, abrabge signifikativamente ona ba munisipio sira no susar atu kontrola, nune rekere ba Timor nia oan tomak atu hatudu dala ida tan luta koletiva atu LIBERTA POVU husi surtu perigoju ne.

Iha luta ida ne rekere fali aman nasaun sira nebe sei hamutuk ho ita nia prontidaun atu diriji no orienta hamutuk ho voz ida deit povu Timor husi kamada oi-oin atu tula dikur ba malu luta hodi halakon imimigu foun ne, povu nesesita sira nia orientasaun ida deit ka unika orden ho palavra de orden “A Luta Continua e A vitoria é Certa” atu dala ida tan luta ba TL no nia emar sira nia diak.

Dadauk ne aman TMR mak nudar xefe exekutivo no aman Luolo nudar PR, pai LAT, FRL, Aluk nsst nebe lidera hela militar, sira hotu exerse hela knar  iha luta foun ne no povu tomak espera sira komvoka tan avo XG, amu Belo, avo Ramos, avo Mari no amu bispu sira atu halo parte nudar lider determinante iha prosesu luta kontra covid 19.

Dadauk ne povu iha situasaun entre fiar no lafiar kona ba existensia covid iha TL, iha sociedade mos mosu pro no kontra kona ba aimoruk VASINA, situasaun ne akontese tamba aman nasaun sira la iha linha ida, lian ida, esforsu ida no asaun ida deit relaciona ho covid no luta kontra covid.

Atu manan no kombate corona virus iha rai doben TL nesesario povu tomak iha hanoin ida deit no halao luta koletiva nune sai forsa boot hodi dudu ses susrtu at nebe estraga no hamate ona povu TL, atu ida ne akontese rekere aman nasaun sira nia hamutuk iha pensamentu no asaun nune bele sai mata dalan no fo forsa no motivasaun bo’ot ba povu tomak atu hamrik hamutuk satan netin inimigu foun ne.

Husi asaun oi-oin no mensagen nebe aman nasaun sira halo hela, hatudu katak sira preokupa ho surtu at ne nia presenca iha TL no sman sira esforsu hela atu kombate maibe esforsu hirak nebe sira halo hela lao ketak-ketak nune la hatudu resultadu signifikativu no dalaruma provoka fragmentasaun pensamentu no persepsaun oi-oin iha sosiedade nia let nebe ho finalidade sei hafraku deit kbiit hodi satan moras at refere.

Karik esforsu no mensagen nebe aman nasaun sira halo tau hamutuk iha fatin ida nudar asaun koletiva, ita iha esperansa bo’ot atu manan tan dala ida no garantia absolutamente katak sei konsege LIBERTA POVU TL husi inimigu invizivel surtu covid 19.

Sem unifikasaun forsa povu tomak nian, liu-liu aman masaun sira nia esforsu, EE no SS deit la to atu kombate surtu at ne’e iha ita rain, maibe ho aman nasaun sira nia hamutuk atu luta hamutuk fiar katak mesmu laiha SS no EE povu tomak sei voluntariamente kumpri regras atu tulun hakotu rede trasmisaun covid 19 no vitoria TL hodi kombate moras at ne garantidu.

HAMUTU ITA KOMBATE SURTU COVID 19

‘Opiniaun ne’e readasaun públika, responsabel husi hakerek nain’