Pasiénte Pozitivu Covid-19 Na’in-7 Kondisaun Grave Baixa Iha Sentru Izolamentu Vera Kruz

Naunil Media (Díli), Portavoz Kordenadór Forsa-Tarefa ba Mitigasaun Surtu Covid-19, Rui Maria de Araújo, informa,   Pasiénte  kazu pozitivu Covid-19    na’in-7  kondisaun grave   baixa hela iha sentru izolamentu Vera Kruz.   

Portavoz Kordenadór Forsa-Tarefa Ba Mitigasaun Surtu Covid-19 Dr. Rui Maria de Araújo hato’o asuntu ne’e Naunil Media asesu liuhusi nota imprensa husi Sentru Jestaun Krize (SIJK), domingu (02/04).

“Ha’u hakarak informasaun husi izolamentu husi  loron   2   Maiu   2021, izolamentu Vera Cruz halo tratamentu ba kazu detetadu nain 23. Iha área obstetrisia nain 5, sirurjia 1, medisina interna nain 14, pediatria nain 4. Sira nain 5 iha obstetrisia, kategoria moderadu hotu, sira nia kondisaun estável no  sira nain 14 iha medisina interna, 7 grave, 7 moderadu. Husi grupu grave, 1 uza ventilador, nain 6 seluk uza oksijéniu no husi kazu 4 pediatria, 2 moderadu 1 grave. Nain 1 grave uza CPAP, no 3 moderadu la uza ona oxijéniu”, dehan Dr. Rui.

Dr. Rui hatutan, koluna kór verde hatudu kazu foun ne’ebé deteta kada loron iha Timor-Leste laran tomak. Liña azul iha gráfiku ne’e, hatudu númeru kazu moderadu no grave ne’ebé baixa iha Vera Cruz, no hatudu katak wainhira ema barak liu detetadu pozitivu, barak-liu tan maka sei baixa ho kategoria moderadu no grave.

Eis Priemiru Ministru Dr. Rui relata, Kazu sirurjia 1 tamba asidente tránzitu, no iha ‘’Severe Head Injury’’ & detetadu pozitivu SARS-Cov-2, ohin 2 de Maiu de 2021 tuku 07h29 dader, hakotu-i’is. Ninia istória klinika hanesan tuir mai:

a). Mane, idade tinan 28, iha dia 27 Abril de 2021, tama iha Departamentu Emerjénsia HNGV ho diagnóstiku ‘’Severe Head Injury’’, hafoin asidente tránzitu. Iha loron ne’e kedas familia husu lori fila ba uma.

b). Dia 29 de Abril de 2021, tama fali iha Departamentu Emerjénsia HNGV ho nivel konsiénsia reduzida (Glasgow Coma Scale: 6). Iha exame diagnóstiku ho CT scan hatudu ‘’Difuse Axional Injury & Edema Cerebri’’. Ida ne’e rezultadu husi trauma iha ulun wainhira hetan asidente tránzitu loron 2 liu bá. Teste PCR hatudu rezultadu pozitivu ho CT: N2 gene 20.6; E gene 20.4
Husi 29 de Abril kalan to’o ohin dader, hetan tratamentu tuir prosedimentu ba ‘’Severe Head Injury’’ iha fatin izolamentu Vera Cruz, atu prevene labele da’et-tutan virus SARS-CoV-2 ba pasiente sira seluk iha HNGV.

c). Hafoin i’is-kotu, teste PCR post-mortem nafatin hatudu SARS-COV-2 pozitivu ho CT N2 gene 24.1, E gene 22.4.

d). Ekipa konjunta saúde sei hein dezisaun husi familia atu halo’ot mate-isin iha fatin preferénsia familia nian, tuir regras ne’ebé determina ona.

“Ha’u aproveita informa mós ba públiku katak, kazu detetadu Covid-19 ida ne’ebé baixa iha Vera Cruz iha dia 12 de Abril de 2021, ho sindroma insufisiénsia respiratória aguda (SIRA), no hahú kedas uza ventiladór iha dia 12 ne’e duni, hahú ohin transfere ona ba Unidade Kuidadus Intensivus HNGV. Ninia teste PCR negativu dala 3 iha dia 23, 24 & 25 Abril 2021, maibé sei nafatin uza ventilador liu husi trakeostomia. Transferénsia ohin ba HNGV lao di’ak, no oras ne’e sei nafatin hala’o ventilasaun asistida”, nia informa.

Evolui surtu Covid-19 nia haktuir,  iha munisípiu Díli, munisipiu sira seluk no mós RAEOA Atu bele hatene surtu ida ninia evolusaun, no mós surtu ne’e aumenta ka diminui, indikador seluk ne’ebé matenek-nain epidemiolojia nian uza, maka insidénsia. Konvensionalmente insidénsia sukat total kazu foun, kada loron, pur 100 mil habitantes, no hatudu risku ne’ebé populasaun iha atu hetan da’et moras ida.

“Gráfiku iha leten hatudu katak média (rata-rata) ba ohin loron, husi insidénsia Covid-19 iha Timor-Leste durante loron 7 ikus maka 5,9/100 mil abitantes, enkuantu ba deit Munisipiu Dili ohin loron nian: 19,7/100 mil abitantes. Insidénsia iha leten sei nafatin hatudu katak Munisipiu Dili maka fatin ho risku bo’ot liu atu populasaun hetan da’et & hada’et tutuan virus SARS-CoV-2.Ipe