Estadu Kondekora Bispu Dom Basilio Ho Kolar Orden TL
Naunil Média (Díli), Prezidente Repúblika, Francisco Guterres Lú-Olo, kondekora Colar Ordem Timor-Leste, títulu póstumu ba Bispu Dom Basílio do Nascimento ba kontribuisaun luta libertasaun nasionál no lidera Igreja iha tempu okupasaun Indonézia no hafoin independénsia.
“Kondekorasaun ho Colar Ordem Timor-Leste, títulu póstumu ba Dom Basílio do Nascimento nuudar rekoñesimentu husi Estadu ba ninia serbisu nunka kolen ba afirmasaun identidade Timoroan liu husi hasae valores no prinsípius moris Katóliku iha Timor-Leste,” Dehan Prezidente Republica Francisco Guterres iha, katedrál Díli, segunda, (1/11).
PR haktuir, estadu Timor-Leste, rekoñese kontribuisaun Dom Basílio nian iha luta ba auto-determinasaun Povu Timor-Leste.
“Saudozu ne’e kontribui ba luta libertasaun nasionál liu hosi enkontrus sekretas ho lider Frente Armada.” haktuir Lu-Olo
Xefe Estadu ne’e akresenta tan, Dom Basílio do Nascimento lidera Igreja iha tempu okupasaun Indonézia nian laós buat fásil ho konflitu oioin entre Katólikus sira.
Nune’e mós la fásil atu lidera Igreja iha períodu hanesan ohin loron, ne’ebé nakonu ho dezafius modernidade.
Nia hatutan, Kondekorasaun ne’e nu’udar simbolu ne’ebé hatudu sentimentu agradesimentu husi Estadu ba espíritu no esforsu, ne’ebé labele nega no manifesta durante tempu luta no prosesu konstrusaun Estadu hafoin Timor-Leste hetan ninia independénsia.
“Iha Dekretu-Lei númeru 20/2009, 6 maiu, mak kria Ordem de Timor-Leste, atu hatudu rekoñesimentu Timor-Leste nian ba sidadaun nasionál no estranjeirus, iha sira-nia serbisu kontribui ba benefisiu Timor-Leste, Timoroan ka umanidade.
Konstituisaun rekoñese papel Igreja nian iha luta libertasaun nasionál no hafoin restaurasaun independénsia.
Dom Basílio do Nascimento iis kotu, iha 30 outubru 2021, iha Hospital Nasional Guido Valadares ho moras kardiaku, hafoin hetan atakasaun iha Covalima. Ana
