PR Horta Lakonkorda Lei Kriminaliza Difamasaun

Naunil Media (Díli), Prezidente Repúblika (PR) José Ramos Horta lakonkorda ho lei kriminaliza difamasaun nune’e sei haree no hakarak muda lei ne’e hodi lakriminaliza difamasaun.

“Ha’u hatete, ha’u lakonkorda ho lei kriminaliza difamasaun para haree, ha’u hakarak lei ne’e muda, entaun ne’e mak ha’u hakarak haree sei muda, ha’u sei propoin para muda lei ne’e para la kriminaliza difamasaun,” dehan Xefe Estadu ba jornalista sira bainhira partisipa iha abertura The Dili Dialogue Forum 2022 iha salaun Laline Larigutu, CNE, Kinta (25/08).

Nune’e Prezidente Repúblika sei halo dialogu ho bankada balun, para muda lei kriminaliza difamasaun ne’e iha periodu mai antes eleisaun, tanba atu kriminaliza loloos mak Assesor sira ne’ebé manán osan bo’ot, maibé laiha produtividade durante loron tomak.

“Purtantu ha’u sei ko’alia halo dialogu iha tinan foun mai ne’e periodu antes eleisaun, hahú kedas agora mas depois ha’u haree ko’alia ho bankada balun para muda lei ne’e parake kriminaliza, entaun loloos imi kriminaliza kuandu halo aktividade hanesan o iha kontratu ho estadu, estadu selu o ho osan bo’ot depois laiha produtividade loron tomak tuur iha ne’ebá hanesan Assesor manán 3.000 ka 5.000 dolares lahalo buat ida ne’eak krime bo’ot liu fali kriminaliza ida ne’e,” tenik Prezidente Repúblika

Horta hateten, Difamasaun ne’e bele hateten intensional ka laintensionál dala ruma Jornalista mós ansi hakarak, hakerek la halo investigasaun laiha meus halo identifikasaun, ne’e duni di’ak liu hatun tiha kriminaliza difamasaun.

Nune’e mós kona-ba kazu Jornalista na’in-2 hanesan Raimondo Oki no Francisco Simões Belo tuir Xefe Estadu di’ak liu arkiva tiha kazu ne’e, tanba dalaruma Prokuradoria Jerál Repúblika rasik mós laiha segredu no mós husu ba MAPKOMS atu bele kansela tiha keixa ne’ebé antes ne’e halo.

“Ne’e mós ha’u hanoin di’ak liu soe tiha, arkiva tiha kazu ne’e, parake prokuradoria buat bar-barak be Prokuradoria Jerál Repúblika laiha segredu liu dalaruma prokurador rasik mak ko’alia, ne’e duni ha’u husu ba prokuradoria depois iha kazu ida ho Ministru Komunikasaun Sosial nian, ha’u mós husu ba ha’u nia alin Ministru ne’e favor arkiva tiha kansela tiha keixa, Ministru iha razaun duni Jornalista husu deskulpa ita hotu-hotu halo sala ha’u mós foin dadaun husu deskulpa ba deputadu sira tanba ha’u bolu fali sira beikten tanba ne’e ha’u husu deskulpa ba sira,” hakotu Horta. *Jos