SEKOMS Vizita Direita Fatin Produsaun Sana Rai
Naunil Media (Manatuto), Sekretáriu Estadu ba Komunikasaun Sosiál, Merício Juvinal dos Reis “AKARA”, vizita direita fatin produsaun Sana Rai husi Grupu Empoderamentu Feto “Bili Bala” iha suku-Ailili, Munisípiu-Manatuto depois halo Sensibilizasaun Literasia Dijitál iha Eskola Sekundária Jerál Kayrala, Sexta-feira, loron 30 fulan-Setembru, tinan-2022.
Vizita ne’e akompañadu husi Prezidente Konsellu Imprensa, Virgilio Guterres, Diretór Edukasaun Munisípiu Manatuto, Adjunto Komandante PNTL Munisípiu Manatuto.
Vizita SEKOMS ne’e, hodi haree direita kreatividade no talentu grupu “Bili Bala”, nian iha (halo sana rai no minikatur husi rai).
Tradisaun halo sana rai no minikatur ne’e produs ho manuál no nia orijinalidade husi Bei-Ala sira.
Grupu “Bili-Bala” sai ona parseiru ba SEKOMS iha tinan kotuk no tuir kapasitasaun balun hanesan oinsá bele utiliza plataforma dijitál hodi halo marketing no hasa’e nia brand produtu hodi sai famoju. Ho objetivu atu fahe talentu no sai inspirasaun ba maluk feto sira seluk iha teritórriu Timor-Leste.
SEKOMS husu grupu sira bele ajusta an, hodi halo kombinasaun idea tradisionál no modernu ba minikatur ka produs sana rai ida hodi nune’e bele kompete iha merkadu nasionál no globál.
Governante ne’e husu ba Média Konvensionál no Média Dijitál sira, atu promove grupu empoderamentu feto potensiál sira iha munisípiu ne’ebé la hetan espasu ba média sira, hodi halo entervista ho sira, hodi sai notísia lokál no nasionál, labele foti notísia politíka ka notísia kona-ba Munisípiu-Dili de’it. */Tri
