Idozu Sira 277 Suku Lalisuk iha RAEOA Simu Pensaun Sosial
Naunil Media (Oe-Cusse), Idozu sira (ferik no katuas ho idade 60 ba leten) hamutun nain-277 husi Suku Lalisuk, Postu Administrativu Pantai Makasar, Rejiaun Administrativu Espesial Oe-Cusse Ambeno (RAEOA) sei simu osan (pensaun sosial).
Xefe Suku, Lalisuk, Hermenegildo Lalisuk, informa pagamentu konaba idozu sira foin lalais tarde tanba Governu foun, no ministériu sei haree fila fali tanba aumenta kada fulan U$57.00.
“Pantai Makasar, suku Malelat mak sei simu uluk depois mak suku Lalisuk. Tanba nee, ohin foin mak pagamentu, iha hau nia suku Lalisuk Benefisiariu hamutuk 277 mak sei simu”, Xefe suku Lalisuk, ba jornalista sira iha, Pantai Makasar, RAEOA, Tersa (15/08).
Antes Nee, Ministra Solidariedade Sosial no Inkluzaun, Veronica das Dores, hatete tuir dekretu lei Nu.53/2022 afirma, pensaun sosial ba ferik no katuas no maluk ho defisiensia sira, sei hetan pagamentu ho montante U$57.00 kada ema ba kada fulan.
Total benefisiariu sira hamutuk 99.564 mak benefisia husi pensaun ne’e, husi Munisipiu 12 inklui RAEOA.
Pagamentu ne’e hala’o kada fulan 6 dala ida, ba tinan ne’e. Pagamentu premeira faze tuir lo-loos akontese iha Julhu 2023, maibe foin bele realiza iha Agostu 2023, iha loron 14 fulan Agostu 2023, tanba sei halo reajustamentu dadus benefisiariu ba tinan ida ne’e nian. Prosesu ne’e hetan asistensia no apoiu masimu husi Instituisaun Nasional Seguransa Sosial MSSI. Ana
