Uma Kain 11 iha Lalisuk, Oe-Cusse Benefisia Polítika Uma Naroman ba Povu

Naunil Media (Oe-Cusse), Komunidade uma kain 11 iha suku Lalisuk, Postu Administrativu, Pantai Makasar,  iha Rejiaun Administrativu Espesial Oe-Cuse Ambeno, sai benefisiariu programa governu konstitusional da-ualu mak Uma Naroman ba Povu (UNP).

Xefe Suku Lalisuk Pantai Makasar, Hermenegildo Lalisuk, hateten Uma Naroman ba Povu iha 2021 hetan rua iha aldeia Albu no Noko, depois iha 2022 no 2023 hetan tan uma 9, uma sira ne’e inaugura hotu ona.

Autoridade Suku Lalisuk informa asuntu ne’e ba jornalista sira iha Pantai Makasar, Oe-Cusse, Tersa (15/08).

“Uma ne’ebe mak sira simu ne’e kategoria +A ne’e mak hanesan kama kompletu iha laran no mos dapur, tanba ne’e mak iha hau nia suku Lalisuk ne’e hau hetan uma kain hamutuk 11 mak sai benefisiáriu ba Uma Naroman ba Povu”, Xefe Suku ne’e esplika

Nia realsa, “Enkuantu konaba ida B+ ne’e detekta tiha ona uma sira ne’e atu troka kalen maibe too agora seidauk hatene los nia rezultadu”.

Hanesan Xefe do Suku nafatin rekomenda ba Nonu Governu konstitusional atu kontinua programa Uma Naroman ba Povu, tanba atu tulun komunidade ne’ebe mak nia ekonomia fraku, inan faluk sira, ema ho desfisiensia no oan ki’ak sira.

Enkuantu konaba Estrada, Autoridade Suku Lalisuk ne’e esplika, estrada iha suku Lalisuk ne’e atinje  70%, komunidade sira bele asesu. no konaba ba bee moos dadaun ne’e iha aldeia ida mak seidauk asesu  ho diak, maibe Programa Nasional Dezenvolventu Suku realiza duni perfurasaun, mak Suku Lalisuk maioria sei asesu   ba bee mos no eletrisidade.

“Rekomenda ba governu konstitusional da-sia atu kontinua nafatin programa hirak ne’e liu-liu PNDS (Programa Nasional Dezenvolvimentu Suku), tanba programa diak ba komunidade.

Total populasaun (abitante) iha Suku Lalisuk tuir dadus tinan 2023 nian hamutuk ona rihun haat. Ana